События

08.08.2023

Айван авылында «Авылым кичләре». Кайтып киләм авылыма.... Туган өем тарта мине...

6 нчы август көнне кичке сәгать 6да башланып китте ул. Айван мәдәният йорты бакчасында авылдашлар җыелды. Арча станциясеннән дә килгәннәр иде. Авылдашлар күп җыелды. Афәрин, оештыручылар! Гомер буе мәдәният өлкәсендә эшләгән Гөлзилә Миңнуллинага, Айван мәдәният йорты җитәкчесе Ләйсән Ялаева һ.б. рәхмәт. Шундый матур, дулкынландыргыч очрашу булды. Казаннан артистлар да кайткан иде. Авылым кичләре Рәдиф Исмәгыйлев башкаруында "Айваным" җыры белән башланып китте. Бәйрәмне җыр, бию ансамбльләре дәвам итте. Авылның тырыш, күренекле кешеләре, иганәчеләр, сәләтле яшьләр бәйрәм түренә чакырылды. Аларга бүләкләр тапшырылды. Казаннан җырчылар Гөлназ Асаева, Зәринә Асылкаева,  Сиринә Зәйнетдинова кайтты. Арчадан яраткан җырчыбыз Расих Галимҗанов, Чиканастан педагог, үзешчән җырчы Халидә Вафина да килде. Авыл үзешчәннәре Светлана Хаҗиева, Гөлнар Шәмсетдинова, Гөлнара Гыйниятуллина, җырчылар, биючеләр белән авыл халкы рәхәтләнеп күңел ачты. Бәйрәмне Айван мәдәният йорты җитәкчесе Ләйсән Ямаева белән бергә алып барган Гөлзилә Миңнуллинадан: "Кем идеясе булды бу?" - дип сорадым. "Мондый авыл бәйрәмнәре күптәннән бара инде, - дип сөйләде Гөлзилә апа. - Аны башта арьякта Илдус абый Әхмәров оештырды. Аннары безнең урам күтәреп алды. Хәзер менә авыл бәйрәменә әйләнде. Аны үткәрмичә ничек йөрәк түзсен?! Түзми... Әлбәттә, бәйрәм оештыра башласаң, акчасы, бүләге дә кирәк. Авылдашлардан бүләк җыю оештырылды. Акчалата ярдәм итүчеләр дә булды. Кызым Айзилә Казан артистларын алып кайтты. Айзилә Казанда эшли. Ит, ит ризыклары белән эшмәкәрлек итә. Тагын бер туганыбыз Гөлүсә Тимошина һәм аның улы Артем Тимошин, Казанда йорт җиһазлары белән эш итүче авылдашыбыз Рәдиф улы Руслан Миңнуллин, сөт җыючы Венера Фазылҗанова, Гөлфия Рысаева шулай ук акчалата ярдәм иттеләр. Ярдәм итүчеләргә бик зур рәхмәт". Оештыручыларга - тынгысыз йөрәкләргә дә бик зур рәхмәт.
Видео 
https://www.youtube.com/watch?v=HzomdI__34w

https://www.youtube.com/watch?v=HJTrqkpjAmg

https://www.youtube.com/watch?v=swU_LJPfypc

https://www.youtube.com/watch?v=Zgt3X7MBSYo

https://www.youtube.com/watch?v=OTRB0XZaEz0

Тулырак: http://arskmedia.ru/news/rayon-yaalyklary/aivan-avylynda-avylym-kiclare-bara